От Луки святое благовествование, глава 3

В пятое же надесяте лето владычества тивериа кесаря, обладающу понтийскому пилату иудеею, и четвертовластвующу галилеею ироду, филиппу же брату его четвертовластвующу итуреею и трахонитскою страною, и лисанию авилиниею четвертовластвующу, при архиереи анне и каиафе, бысть глаголгол Божий ко иоанну захариину сыну в пустыни. И прииде во всю страну иорданскую, проповедая крещение покаяния во оставление грехов: якоже есть писано в книзе словес исаии пророка, глаголюща: глас вопиющаго в пустыни: уготовайте путь Господень: правы творите стези его: всяка дебрь исполнится, и всяка гора и холм смирится: и будут стропотная в правая, и острии в пути гладки: и узрит всяка плоть спасение Божие. Глаголаше же исходящым народом креститися от него: порождения ехиднова, кто сказа вам бежати от грядущаго гнева? Сотворите убо плоды достойны покаяния: и не начинайте глаголати в себе: отца имамы авраама: глаголю бо вам, яко может Бог от камения сего воздвигнути чада аврааму. Уже бо и секира при корени древа лежит: всяко убо древо не творящее плода добра посекается и во огнь вметается. И вопрошаху его народи, глаголюще: что убо сотворим? Отвещав же глагола им: имеяй две ризе, да подаст неимущему: и имеяй брашна, такожде да творит. Приидоша же и мытари креститися от него и реша к нему: учителю, что сотворим? Он же рече к ним: ничтоже более от повеленнаго вам творите. Вопрошаху же его и воини, глаголюще: и мы что сотворим? И рече к ним: ни когоже обидите, ни оклеветавайте: и доволни будите оброки вашими. Чающым же людем, и помышляющым всем в сердцах своих о иоанне, еда той есть Христос, отвещаваше иоанн всем, глаголя: аз убо водою крещаю вы: грядет же креплий мене, емуже несмь достоин отрешити ремень сапогу его: той вы крестит Духом святым и огнем: емуже лопата в руку его, и отребит гумно свое, и соберет пшеницу в житницу свою, плевы же сожжет огнем негасающим. Многа же убо и ина утешая благовествоваша людем. Ирод же четвертовластник, обличаемь от него о иродиаде жене брата своего, и о всех, яже сотвори злая ирод, приложи и сие над всеми, и затвори иоанна в темнице. Бысть же егда крестишася вси людие, и Иисусу крещашуся и молящуся, отверзеся небо, и сниде Дух святый телесным образом, яко голубь, нань: и глас с небесе бысть, глаголя: ты еси Сын мой возлюбленный, о тебе благоволих. И той бе Иисус яко лет тридесять начиная, сый, яко мнимь, Сын иосифов, илиев, матфатов, левиин, мелхиин, ианнаев, иосифов, маттафиев, амосов, наумов, еслимов, наггеов, маафов, маттафиев, семеиев, иосифов, иудин, иоаннанов, рисаев, зоровавелев, салафиилев, нириев, мелхиев, аддиев, косамов, елмодамов, иров, иосиев, елиезеров, иоримов, матфатов, левиин, симеонов, иудин, иосифов, ионанов, елиакимов, мелеаев, маинанов, маттафаев, нафанов, давидов, иессеов, овидов, воозов, салмонов, наассонов, аминадавов, арамов, есромов, фаресов, иудин, иаковль, исааков, авраамов, фарин, нахоров, серухов, рагавов, фалеков, еверов, саланов, каинанов, арфаксадов, симов, ноев, ламехов, мафусалев, енохов, иаредов, малелеилов, каинанов, еносов, сифов, адамов, Божий.