От Луки святое благовествование, глава 8

И бысть посем, и той прохождаше сквозе грады и веси, проповедуя и благовествуя Царствие Божие: и обанадесяте с ним, и жены некия, яже бяху изцелены от духов злых и недуг: мариа нарицаемая магдалина, из неяже бесов седмь изыде, и иоанна жена хузаня, приставника иродова, и сусанна, и ины многи, яже служаху ему от имений своих. Разумевающу же народу многу, и от всех градов грядущым к нему, рече притчу: изыде сеяй сеяти семене своего: и егда сеяше, ово паде при пути, и попрано бысть, и птицы небесныя позобаша е: а другое паде на камени, и прозяб усше, зане не имеяше влаги: и другое паде посреде терния, и возрасте терние, и подави е: другое же паде на земли блазе, и прозяб сотвори плод сторицею. Сия глаголя, возгласи: имеяй ушы слышати, да слышит. Вопрошаху же его ученицы его, глаголюще: что есть притча сия? Он же рече: вам есть дано ведати тайны Царствия Божия, прочым же в притчах, да видяще не видят и слышаще не разумеют. Есть же сия притча: семя есть слово Божие: а иже при пути, суть слышащии, потом (же) приходит диавол и вземлет слово от сердца их, да не веровавше спасутся: а иже на камени, иже егда услышат, с радостию приемлют слово: и сии корене не имут, иже во время веруют, и во время напасти отпадают: а еже в тернии падшее, сии суть слышавшии, и от печали и богатства и сластьми житейскими ходяще подавляются, и не совершают плода: а иже на добрей земли, сии суть, иже добрым сердцем и благим слышавше слово, держат и плод творят в терпении. Сия глаголя, возгласи: имеяй ушы слышати, да слышит. Никтоже (убо) светилника вжег, покрывает его сосудом, или под одр подлагает: но на свещник возлагает, да входящии видят свет. Несть бо тайно, еже не явлено будет: ниже утаено, еже не познается и в явление приидет. Блюдитеся убо, како слышите: иже бо имать, дастся ему: и иже аще не имать, и еже мнится имея, возмется от него. Приидоша же к нему Мати и братия его, и не можаху беседовати к нему народа ради. И возвестиша ему, глаголюще: Мати твоя и братия твоя вне стоят, видети тя хотяще. Он же отвещав рече к ним: мати моя и братия моя сии суть, слышащии слово Божие, и творящии е. И бысть во един от дний, той влезе в корабль и ученицы его: и рече к ним: прейдем на он пол езера. И поидоша. Идущым же им, успе. И сниде буря ветреная в езеро, и скончавахуся и в беде беху. И приступльше воздвигоша его, глаголюще: наставниче, наставниче, погибаем. Он же востав запрети ветру и волнению водному: и улегоста, и бысть тишина. Рече же им: где есть вера ваша? Убоявшеся же чудишася, глаголюще друг ко другу: кто убо сей есть, яко и ветром повелевает и воде, и послушают его? И преидоша во страну гадаринску, яже есть об он пол галилеи. Изшедшу же ему на землю, срете его муж некий от града, иже имяше бесы от лет многих, и в ризу не облачашеся, и во храме не живяше, но во гробех. Узрев же Иисуса и возопив, припаде к нему, и гласом велиим рече: что мне и тебе, Иисусе Сыне Бога вышняго? молюся ти, не мучи мене. Повеле бо духови нечистому изыти от человека: от многих бо лет восхищаше его: и вязаху его узы (железны) и путы, стрегуще его: и растерзая узы, гонимь бываше бесом сквозе пустыни. Вопроси же его Иисус, глаголя: что ти есть имя? Он же рече: легеон: яко беси мнози внидоша в онь. И моляху его, да не повелит им в бездну ити. Бе же ту стадо свиний много пасомо в горе: и моляху его, да повелит им в ты внити. И повеле им. Изшедше же беси от человека, внидоша во свиния: и устремися стадо по брегу в езеро, и истопе. Видевше же пасущии бывшее, бежаша, и возвестиша во граде и в селех. Изыдоша же видети бывшее: и приидоша ко Иисусови и обретоша человека седяща, из негоже беси изыдоша, оболчена и смысляща, при ногу Иисусову: и убояшася. Возвестиша же им видевшии, како спасеся бесновавыйся. И моли его весь народ страны гадаринския отити от них, яко страхом велиим одержими беху. Он же влез в корабль, возвратися. Моляшеся же ему муж, из негоже изыдоша беси, дабы с ним был. Отпусти же его Иисус, глаголя: возвратися в дом твой и поведай, елика ти сотвори Бог. И иде, по всему граду проповедая, елика сотвори ему Иисус. Бысть же егда возвратися Иисус, прият его народ: беху бо вси чающе его. И се, прииде муж, емуже имя иаир, и той князь сонмищу бе: и пад при ногу Иисусову, моляше его внити в дом свой: яко дщи единородна бе ему, яко лет двоюнадесяте, и та умираше. Егда же идяше, народи угнетаху его. И жена сущи в точении крове от двоюнадесяте лету, яже врачем издавши все имение, (и) не возможе ни от единаго изцелети: (и) приступльши созади, коснуся края риз его: и абие ста ток крове ея. И рече Иисус: кто есть коснувыйся мне? Отметающымся же всем, рече петр и иже с ним: наставниче, народи одержат тя и гнетут, и глаголеши: кто есть коснувыйся мне? Иисус же рече: прикоснуся мне некто: аз бо чух силу изшедшую из мене. Видевши же жена, яко не утаися, трепещущи прииде, и падши пред ним, еяже ради вины прикоснуся ему, поведа ему пред всеми людьми, и яко изцеле абие. Он же рече ей: дерзай дщи, вера твоя спасе тя: иди в мире. Еще ему глаголющу, прииде некий от архисинагога, глаголя ему, яко умре дщи твоя: не движи учителя. Иисус же слышав отвеща ему, глаголя: не бойся, токмо веруй, и спасена будет. Пришед же в дом, не остави ни единаго внити, токмо петра и иоанна и иакова, и отца отроковицы, и матере. Плакахуся же вси и рыдаху ея. Он же рече: не плачитеся: не умре (бо), но спит. И ругахуся ему, ведяще, яко умре. Он же изгнав вон всех, и емь за руку ея, возгласи, глаголя: отроковице, востани. И возвратися дух ея, и воскресе абие: и повеле дати ей ясти. И дивистася родителя ея. Он же повеле има ни комуже поведати бывшаго.